Pwy rydym yn gallu eu helpu

Roedd Cwmni Cyfyngedig A wedi cwyno wrthym am y modd roedd ei fanc wedi trafod ei gais  diweddar am fenthyciad. Fel rhan o’n gwiriad awdurdodaeth roedd rhaid i ni ystyried cyfanswm mantolen Cwmni Cyfyngedig A.

Roedd ei Fantolen ar ddiwedd y flwyddyn ariannol ddiwethaf cyn y gŵyn fel a ganlyn:

Roedd Cwmni Cyfyngedig B wedi cwyno wrthym yn Ebrill 2020 bod ei fanc wedi cau ei gyfrif yn annheg heb ei hysbysu. Dywedodd y banc wrthym bod Cwmni Cyfyngedig B yn rhy fawr i gwyno wrthym gan fod ei drosiant blynyddol yn ôl ei gyfrif a archwiliwyd ddiwethaf ar 31 Mawrth 2020 yn £7.5 miliwn ac roedd y swm hwn y tu allan i’n trothwy o £6.5 miliwn.

Fodd bynnag, roedd cyllid Cwmni Cyfyngedig B dros y ddwy flynedd flaenorol wedi bod fel a ganlyn:

Mae Cwmni Cyfyngedig C yn gwmni fferyllol, a ddaeth â’i gŵyn atom am hawliad yswiriant roedd ei yswiriwr wedi gwrthod talu. Ar y pryd roedd wedi cwyno wrth y cwmni yswiriant, roedd gan Gwmni Cyfyngedig C drosiant blynyddol o £5 miliwn, 25 o gyflogeion llawn amser  a chyfanswm asedau o £1.5 miliwn.

Felly, ar yr wyneb, roedd yn fusnes bach o dan ein rheolau ac felly’n gymwys i gwyno i ni.

Fodd bynnag, wedi ymchwilio ymhellach canfuom fod gan Gwmni Cyfyngedig C gyfranddaliad o 70% mewn cwmni arall, Cwmni Cyfyngedig D.

Gan fod cyfranddaliad mwyafrif gan Gwmni Cyfyngedig C yng Nghwmni Cyfyngedig D, i gyrraedd y meini prawf maint i’n dibenion awdurdodaethol, roedd rhaid i ni ychwanegu ffigurau Cwmni Cyfyngedig D yn ogystal. Felly:

Gan fod y trosiant cyfunol dros £6.5 miliwn, roedd Cwmni Cyfyngedig C nawr dros y trothwy ac nid oeddem yn gallu ystyried ei gŵyn. 

Noder bod hyn hefyd yn gweithio y ffordd arall. Felly, er enghraifft, os oedd gan gwmni arall gyfranddaliad mwyafrif yng Nghwmni Cyfyngedig C, yna i gyrraedd y meini prawf maint, byddai angen i ni ychwanegu cyfrif pennau staff a data ariannol y cwmni hwnnw hefyd. 

Ychwanegir cyfran o faint unrhyw fusnes partner at faint eich busnes. 

Mae Cwmni Cyfyngedig E yn gwerthu diodydd ysgafn, gan gynnwys diodydd ffisiog a suddoedd ffrwythau. Roedd yn ddiweddar wedi trefnu yswiriant atebolrwydd cyhoeddus ond roedd yn poeni bod ei bolisi wedi’i gamwerthu gan ei frocer. Gofynnodd i ni adolygu ei gŵyn.

Roedd gan Gwmni Cyfyngedig E drosiant o £2 filiwn a mantolen o £1.8 miliwn. Roedd yn cyflogi 20 o bobl yn llawn amser.

Mae Cwmni Cyfyngedig E mewn partneriaeth â Chwmni Cyfyngedig F ac mae ganddo ran 40% yng Nghwmni Cyfyngedig F. Mae Cwmni Cyfyngedig F yn cyflogi 40 o bobl yn llawn amser. Mae ganddo drosiant o £4 miliwn a mantolen o £10 miliwn. 

Felly, i gyfrifo’r cyfrif pennau a data ariannol i asesu a oedd awdurdodaeth gennym i ystyried y gŵyn, roedd angen i ni ychwanegu canran berthnasol y data ar gyfer Cwmni Cyfyngedig F at Gwmni Cyfyngedig E. Felly mae hynny’n golygu:

Roedd y trosiant perthnasol cyfunol yn £3.6m, a oedd o dan y trothwy o £6.5m. Felly bodlonwyd yr amod hwnnw.

Roedd angen i ni wedyn sicrhau bod o leiaf un o naill ai’r cyfrif pennau staff neu gyfanswm y fantolen o dan ein trothwy. Dangosodd y data er bod cyfanswm yr asedau dros £5m, roedd y cyfrif pennau o dan 50, felly bodlonwyd y trothwy cyfrif pennau hefyd.

Roedd hyn yn golygu bod Cwmni Cyfyngedig E yn gymwys i ddod â’i gŵyn atom. 

Nid yw’r cyfrifiadau hyn bob amser yn syml felly cysylltwch â ni os nad ydych yn siŵr. 

Roedd Elusen G yn cwyno am yr amser a gymerodd ei banc i newid ei mandad. Ar yr adeg honno, roedd gan yr elusen 80 o staff, £6 miliwn o asedau ac incwm blynyddol o £5 miliwn.

Roedd yr elusen yn gallu dod â’i chwyn atom. Roedd hyn oherwydd bod ei hincwm blynyddol o dan ein trothwy o £6.5 miliwn.

Yn annhebyg i’r meini prawf maint ar gyfer Mentrau Bach a Chanolig, mae cyfanswm yr asedau a’r cyfrif pennau staff yn amherthnasol i ystyried cymhwysedd yr elusen.

Roedd ymddiriedolwyr Ymddiriedolaeth H wedi cwyno wrthym am wall gweinyddol gan fanc yr ymddiriedolaeth ym mis Medi 2018.

Roedd yr ymddiriedolwyr wedi cwyno wrth y banc am y mater hwn ym mis Gorffennaf 2019 cyn dod a’r gŵyn atom. Ar yr adeg roeddent wedi cwyno wrth y banc, roedd cyfanswm asedau’r ymddiriedolaeth yn £6 miliwn ac roedd ei hincwm blynyddol yn £600,000. 

Mae ein trothwy awdurdodaethol ar gyfer ymddiriedolaethau’n ymwneud â gwerth asedau net - nid asedau gros (fel yn achos busnesau bach) neu incwm blynyddol.

Roedd asedau net Ymddiriedolaeth H ar yr adeg roedd wedi cwyno wrth y banc yn £4 miliwn.

Fodd bynnag, roedd cwyn yr ymddiriedolwyr am rywbeth a oedd wedi digwydd cyn 1 Ebrill 2019. Mae hyn yn bwysig oherwydd bod y trothwy ar gyfer ein hawdurdodaeth i ystyried cwynion gan ymddiriedolaethau’n wahanol ar gyfer digwyddiadau ar ôl 1 Ebrill 2019 i ddigwyddiadau cyn hynny. Er mai £6.5 miliwn yw  maint ein trothwy ar gyfer ymddiriedolaethau nawr, mae hyn yn ymwneud â digwyddiadau ar ôl 1 Ebrill 2019. Ar gyfer cwynion am ddigwyddiadau cyn 1 Ebrill 2019, y trothwy yw £1 miliwn.

Felly, roedd Ymddiriedolaeth H yn rhy fawr ar yr adeg y digwyddodd y digwyddiadau ac nid oeddem yn gallu ystyried ei chwyn.

Nid yw penderfynu’r adeg pan oedd y digwyddiad y derbynnir cwyn amdano wedi digwydd mewn gwirionedd bob amser yn syml. Felly os nad ydych yn sicr cysylltwch â ni.

Roedd Helen yn un o gyfarwyddwyr Cwmni Cyfyngedig I. Ym mis Mehefin 2019, roedd angen i’r cwmni fenthyg peth arian gan y banc ac arwyddodd Helen warant fel sicrhad ar gyfer benthyciad y cwmni. O fewn chwe mis, roedd gan y cwmni broblemau ariannol ac nid oedd yn gallu ad-dalu’r benthyciad. Mynnodd y banc fod Helen yn ei ad-dalu o dan ei gwarant. Cwynodd nad oedd y banc wedi gweithredu’n deg.

Gwnaethpwyd y cytundeb gwarant yn yr achos hwn ar 10 Mehefin 2019 a oedd ar ôl yr adeg y newidiodd y rheolau ar 1 Ebrill 2019 i gynnwys gwarantau a roddwyd mewn perthynas â benthyciadau i fusnes gan gyfarwyddwr neu randdeiliad y busnes hwnnw.

Felly roeddem yn gallu ystyried cwyn Helen.

Roedd Cyngor Plwyf J wedi cwyno wrthym bod ei yswiriwr wedi gwrthod ei hawliad yn annheg mewn perthynas â’i yswiriant cyflogaeth.

Daethom i’r casgliad, fel corff cyhoeddus yn cyflawni ei ddyletswyddau i ddarparu gwasanaeth cyhoeddus, nad oedd y cyngor yn ficrofenter neu’n fusnes bach. Ac nid oedd unrhyw gategorïau eraill o achwynydd cymwys o dan ein rheolau cyfredol a allai fod yn gymwys ar ei gyfer. Felly, nid oeddem yn gallu ystyried ei gŵyn.  

Nid yw hyn yn golygu na allai cyngor plwyf fyth fodloni’r meini prawf perthnasol, yn arbennig pan fydd yn cymryd rhan mewn gweithgarwch economaidd. Rydym yn ystyried awdurdodaeth ymhob achos yn seiliedig ar ffeithiau ac amgylchiadau unigol. Felly, os byddwn yn ansicr, cysylltwch â ni.

Roedd Clwb Golff K wedi gwneud dau drosglwyddiad banc i sgamiwr a oedd trwy gamgymeriad wedi credu mai ei gyflenwr ydoedd. Roedd yn anhapus bod ei fanc wedi gwrthod ad-dalu’r arian.

Dywedodd y banc nad oedd y clwb yn syrthio i unrhyw un o’r categorïau achwynydd cymwys o dan ein rheolau (esbonnir hyn yn llawn yn llawlyfr yr FCA yn DISP 2.7.3R), felly ni allem ystyried ei gŵyn.

Mae clybiau a chymdeithasau fel arfer yn cymryd ffurf sefydliadau anghorfforaethol. Fodd bynnag, i ddod â chwyn atom mae angen iddynt fodloni un o’r meini prawf a nodir yn DISP 2.7 3R. 

Ni fydd cymdeithas anghorfforaethol yn ddefnyddiwr oherwydd, yn ôl diffiniad, ni fyddai’n unigolyn.  A bydd a yw’n bodloni unrhyw un o’r meini prawf eraill yn dibynnu ar ei bwrpas a’i gyfansoddiad. Er mwyn ystyried hyn, mae’n bosibl y bydd angen i ni edrych ar gopi o’i ddogfennau llywodraethu.

Yn achos Clwb Golff K roeddem wedi adolygu dogfennau llywodraethu’r clwb ac edrych yn fanwl ar yr hyn roedd y clwb yn ei wneud. Roedd y clwb yn cynnig aelodaeth i’r cyhoedd wrth dalu ffi blynyddol. Roed set o fanteision gyda’r aelodaeth. Hefyd, roedd y clwb yn cynnig nwyddau i’w gwerthu i'w aelodau a’r cyhoedd. Roedd hefyd yn llogi ei adeiladau ar gyfer cyfarfodydd busnes a phriodasau.

Daethom i’r casgliad fod y clwb yn eglur yn cynnal gweithgareddau economaidd ac o’r herwydd roedd yn gymwys i ddod â’i gŵyn atom fel microfenter neu fusnes bach, gan ddibynnu ar ei faint. Yn yr enghraifft hon roedd yn ddigon bach i gael ei ystyried fel microfenter.